ᐲᑕ ᒧᑖᒃ ᐃᓅᓕᕐᑐᕕᓂᖅ ᓯᑉᑎᒻᐱᕆ 3ᒥ, 1929, St. John's, Newfoundland-ᒥ. ᑕᕐᕋᓕᐊᕆᐅᕐᓯᒪᔪᖅ 1947ᒥᑦ 1957 ᑎᑭᑦᓱᒍ, ᐊᖓᔪᕐᖄᓲᑦᓱᓂ, ᐊᖓᔪᕐᖄᒍᑦᓱᓂᓗ ᑲᒪᐸᓂᒃᑯᓄᑦ, ᓄᓇᓕᓐᓄᑦ ᑭᒻᒥᕈᕐᒧᑦ, ᐸᓐᓂᑑᕐᒧᑦ, ᑭᖕᖓᓄᑦ, ᑰᑦᔪᐊᒧᑦ, ᑲᖏᖅᓱᐊᓗᔾᔪᐊᒧᑦ, ᑲᖏᕐᓱᒧᑦ, ᑲᖏᕐᑐᒑᐱᒻᒧ, ᒥᑦᑎᒪᑕᓕᒻᒧᑦ, ᑎᑭᕋᑕᕐᓱᓂ ᐳᕕᕐᓂᑐᒧᑦ, ᑎᑭᖃᑎᖃᕐᓱᓂ ᐊᕐᓇᒥᓂᒃ ᓘᓯᓪᒥᒃ 1955ᒥ. ᓱᓇᐅᕝᕙ ᐃᓅᓯᓕᒪᖅ ᐃᓄᓐᓂᒃ ᐃᓅᖃᑎᖃᕐᓂᐊᓕᕐᓱᓂ, ᖃᐅᔨᒪᔮᖅᑖᓯᒪᒻᒪᕆᓕᕐᓱᓂ, ᐃᓗᕐᕈᓯᖏᓐᓂᓗ, ᐅᖃᐅᓯᖏᓐᓂᓗ ᐱᔪᓐᓇᓯᓯᒪᑦᓯᐊᓕᕐᓱᓂ ᑖᒃᑯᓇᓂ ᐊᕐᕋᒍᕐᓂ.

ᑕᕐᕋᒥ ᐱᓇᓱᓐᓂᖓ ᓱᓕ ᑲᔪᓯᓯᒪᔪᖅ ᑲᕙᒪᑐᖃᒃᑯᓄᑦ ᐱᓇᓱᑦᑎᑖᕆᔭᐅᑦᓱᓂ 1958ᒥ, ᐃᓪᓗᓂᒃ ᐊᑭᑭᑦᑐᓂᒃ ᓇᕝᕚᕋᓱᐊᕐᓱᑎᒃ ᐃᓄᐃᑦ ᐱᒋᒐᔭᕐᑕᖏᓐᓂᒃ. ᑐᖓᓕᐊᒍᓪᓗ ᑲᖏᓪᓕᓂᐅᑉ ᓄᓇᓕᖓᓂᒃ ᓇᑉᐯᒋᐊᕐᑐᓱᑎᒃ ᐃᓄᐃᑦ ᑲᖏᕙᓯᑦᑐᒥᐅᔦᑦ ᓄᓇᓕᑦᑖᕆᒐᔭᕐᑕᖓᓂᒃ, ᓅᑕᐅᔪᑦ ᑖᕗᖓ. ᐃᓄᓕᕆᔨᑐᖃᒃᑯᓄᑦ ᑲᓇᑕᒥ, ᐱᓇᓱᑦᑎᑖᕆᔭᐅᓕᓚᐅᕐᓯᒪᒋᕗᖅ 1964ᒥᑦ 1966 ᑎᑭᑦᓱᒍ, ᓄᓇᓕᓕᒫᓄᐊᖓᑦᓱᓂ ᐊᐅᓚᑦᓯᔨᖁᑎᒋᔭᐅᑦᓱᓂ ᑲᕙᒪᑐᖃᒃᑯᑦ ᐱᒍᔾᔨᓂᕐᒥᓂᒃ ᐊᐅᓚᑕᖏᓐᓂᒃ, ᑐᖕᖓᕕᖃᕐᓱᑎᒃ Yellowknife, ᓄᓇᑦᓯᐊᒥ ᑖᕙᓂ ᐃᓚᒌᑦ ᐱᐊᕌᐱᒋᓕᕐᑕᖏᓪᓗ ᓄᓇᖃᕐᓱᑎᒃ.

ᐊᑑᑎᓯᒪᔭᓕᒫᒥᓂᑦ ᐊᓕᐊᒋᓯᒪᒻᒪᕆᑦᑕᖓ ᑕᑦᓱᒪᓂ 1966ᒥ ᐱᓇᓱᐊᖃᑕᐅᓚᐅᕐᓯᒪᒐᒥ ᓂᐱᓕᐅᕆᖃᑕᐅᑦᓱᓂ ᑐᓴᕐᓴᐅᕙᑦᑐᕕᓂᕐᓂᒃ ᓈᓚᐅᑎᒃᑯᑦ ᓰᐱᓰᒃᑯᑎᒍ. ᓂᐱᓕᐅᖃᑎᖃᕐᓱᓂ  Farley Mowat ᒥᑦ, ᓰᐱᓰ ᐱᓇᓱᑦᑎᖓᓂᒃ ᑕᕐᕋᒥ ᐱᒍᑦᔨᓂᖓᑎᒍᑦ, ᑯᐯᒃ ᑕᕐᕋᖓᓂ, ᕿᑭᕐᑖᓗᒻᒥ, ᐅᐊᓕᓂᕐᒥᐅᑦ ᐅᑭᐅᕐᑕᑐᖓᓂᓗ. ᑌᑦᓱᒪᓂᑕᒐ, ᐊᕐᕕᑕᖃᑕᐅᑦᓱᓂ, ᐳᕕᕐᓂᑐᕐᒥᐅᑦ ᑯᐊᐸᖓᑕ ᑲᑐᑦᔨᖃᑎᒌᓐᓂᖓᓄᑦ ᑲᑎᒪᔨᐅᔪᖅ ᐋᓚᓯ ᐊᓛᓱᐊᖅ, ᐅᒥᑲᓪᓚᓗ (Father André Steinmann)  ᐃᑲᔪᕐᑕᐅᒍᒪᓚᐅᕐᓂᖁᑦ ᑯᐊᐸᒃᑰᓕᕐᑐᓂᒃ ᑲᑐᔾᔨᕕᑦᑖᖁᔨᑦᓱᑎᒃ ᑯᐊᐸᒥᓂᒃ.

ᐃᑲᔪᕐᑎᑖᖅᓱᓂ, ᓴᐳᒻᒥᔨᒋᓯᑦᓱᒋᓪᓗ ᑯᐊᐸᖃᑎᒋᕝᕕᒪᕆᖓ ᑯᐯᒻᒥ ᑯᐊᐸᑦᑐᐃᑦ Coopération du Québec (CCQ) ᑯᑦ,  ᐲᑕ ᐊᓱᐃᓚᒃ ᑐᖕᖓᓂᓕᕐᑎᕆᓕᓚᐅᕐᓯᒪᕗᖅ ᐃᓚᒌᓴᖓᓂᑦ ᑯᐊᐯᑦ ᑯᐯᒃ ᑕᕐᕋᖓᓂ (ᐃᓚᒌᓴᖅ) ᐱᓇᓱᖃᑎᖃᕐᓱᓂ ᐊᒥᓲᖕᖏᑐᓂᒃ ᐃᓄᓐᓂᒃ ᐃᓚᖃᕐᑎᓗᒋᑦ ᐊᓪᓚᒥᒃ. ᐱᓇᓱᐊᖃᑎᖃᕐᓱᓂ ᑕᓪᓕᒪᓂᑦ ᓄᓇᓕᓐᓂᑦ ᐅᑯᓇᓂ ᐱᓯᒪᔪᓂ, ᑲᖏᕐᓱᐊᓗᔾᔪᐊᖅ, ᐳᕕᕐᓂᑐᖅ, ᑰᔾᔪᐊᖅ, ᑰᔾᔪᐊᕌᐱᒃ, ᑲᖏᕐᓱᓗ. ᖃᐅᔨᒪᑦᓯᐊᓂᖓ ᐃᓄᐃᑦ ᐃᓗᕐᕈᓯᖓᓐᓂᒃ, ᐃᓄᓐᓂᓗ ᓲᓱᑦᓴᓂᖓ ᐃᑲᔪᒻᒪᕆᑦᓯᒪᕗᑦ ᐃᓄᓐᓂᒃ ᐃᓕᓭᓯᑎᓪᓗᒍ ᖃᓄᖅ ᑯᐊᐯᑦ ᐱᐅᓯᖃᓲᒍᒻᒪᖔᑕ, ᑐᖓᓕᐊᒍᓪᓗ ᐃᑲᔪᕐᓱᑎᒃ ᐃᓄᐃᑦ ᓄᓇᓕᖏᓐᓂᒃ ᑯᐊᐸᓕᐅᖃᑎᒋᑦᓱᒋᑦ. ᓘᓯᓪᓗ, ᐊᕐᓇᖓ, ᐃᑲᔪᖃᑎᒌᑦᓯᒪᔫᒃ ᐅᖃᐅᓯᕐᓂᒃ ᑮᓇᐅᔭᓕᕆᓂᕐᒧᐊᖓᔪᓂᒃ ᐅᖃᐅᓯᓕᐅᕐᓱᑎᒃ ᐃᓄᑦᑎᑑᕐᑐᓂᒃ. ᑕᕘᓇᑕᒐ ᐃᓄᐃᑦ ᑯᐊᐸᒥ ᑲᑎᒪᔩᑦ, ᑲᒪᔨᖁᑎᖏᓪᓗ ᐊᐅᓚᑦᓯᔨᖕᖑᕈᓐᓇᓯᓚᐅᕐᓯᒪᕗᑦ ᖃᓪᓚᓈᖅᑎᑐᑦ ᐃᓕᓐᓂᐊᕕᒻᒥ ᐃᓕᓐᓂᐊᓯᒪᖕᖏᑲᓗᐊᕋᒥᒃ, ᐱᔪᓐᓇᓯᓯᒪᕗᑦ ᑯᐊᐸᒥᓂᒃ ᐊᐅᓚᑦᓯᒍᓐᓇᓯᑦᓱᑎᒃ ᑌᒣᓕᖓᔪᒃᑯᑦ. ᐱᓇᓱᖃᑎᒋᖃᑦᑕᓯᒪᔭᖏᑦ ᐃᓚᒌᓴᒃᑯᓂ, ᐃᓱᒪᖃᓲᒍᕗᑦ ᐲᑕᒥᑦ ᐃᓚᓐᓈᖃᕐᓂᒥᑦ, ᐱᒋᐅᕐᓴᑎᓯᔨᖃᕐᓂᒥᓂᑦ, ᐃᓚᕋᓀᑦᑐᖁᑎᖃᕐᓂᒥᒃ, ᐃᒫᙰᕐᑎᖃᕐᓂᒥᒃ, ᐊᒻᒪᓗ ᐊᑖᑕᖕᖑᐊᖃᕐᑑᔮᕐᓱᑎᐊᓪᓚᑦ. ᐃᓕᓐᓂᐊᑎᑦᓯᖃᑦᑕᓯᒪᔪᖅ ᐃᓄᑦᑎᑑᕆᐅᕐᓴᑫᑦᓱᓂ ᐊᒥᓱᓂᒃ. ᐱᐅᓯᖃᕐᓱᓂᓗ ᐅᖄᖃᑎᖃᑦᓯᐊᕈᓐᓇᓱᓂ ᑭᓇᐅᒐᓗᐊᕐᐸᑦ, ᐃᓚᓐᓈᑕᖕᖑᓱᑦᓱᓂ.

ᐱᓇᓱᐊᖃᑎᒥᓂᐅᒐᓗᐊᖅ. ᓄᕐᖃᓚᐅᕐᓯᒪᔪᖅ ᐃᓚᒌᓴᒃᑯᓂ ᐃᓄᒻᒪᕆᖕᖑᓯᒪᓕᕐᓂᒥᓄᑦ 1997ᒥ. ᓈᔨᓯᒪᑦᓱᓂᓗ 30ᓂ ᐊᕐᕌᒍᓂ ᑲᒪᔨᒻᒪᕆᐅᑦᓱᓂ. ᐃᓅᓯᓕᒪᒥᑎᒍᑦ ᓱᓕᓱᓕ ᓄᕐᖃᔪᐃᑦᑑᒐᓗᐊᕐᓱᓂ. ᐲᑕ ᐃᓱᒪᒋᔭᖃᕐᓯᒪᔪᖅ ᐃᓄᐃᑦ ᓇᒻᒥᓂᕐᒥᑎᒍᑦ ᒪᑭᑕᒍᓐᓇᑐᕆᑦᓱᒋᑦ, ᐃᓚᒌᓴᕐᒧᑦ ᐃᑲᔪᕐᑕᐅᓗᑎᒃ. ᐃᓱᒪᒍᓯᐅᔪᖅ ᐱᓂᐊᕐᓂᖑᕐᑎᓯᒪᔭᖓ ᑌᔭᐅᔪᓂ ᐱᓇᓱᖃᑎᒋᓐᓃᑦ ᐱᕙᓪᓕᐊᑎᑦᓯᓂᕐᑎᒍᑦ ᑭᓇᒃᑯᑐᐃᓐᓇᐅᔪᓂᒃ, ᑭᓇᓗᓐᓃᑦ ᕿᒪᓐᓇᒍ. ᑕᒪᑦᓱᒪ ᑯᐊᐸᖃᑎᒋᓐᓂᐅᑉ ᓄᓇᕕᒻᒥ, ᐃᓚᐅᖃᑕᐅᔪᒻᒪᕆᐅᕗᖅ ᓱᓕ ᑐᓂᓯᒪᓂᖓ 50ᑦ ᐊᕐᕌᒍᓄᑦ ᐅᖓᑖᓄᕐᑐᓂ, ᐱᓇᓱᐊᖃᑎᖃᕐᓯᒪᓂᖓᑎᒍᑦ ᐃᓄᓐᓂᒃ.

ᐊᖓᔪᕐᖄ ᐋᓕᕙ ᑐᓗᒐᖅ ᐅᓂᑳᓯᒪᔪᖅ ᐲᑕᐅᑉ ᒥᑦᓵᓄᑦ, ᓴᓪᓗᓚᐅᕐᓂᒪᒍᖅ ᐅᑭᐅᒥᓂᒃ ᓴᓪᓗᒍᑎᖃᕐᓱᓂ. ᓴᓪᓗᖏᒃᑯᓂ ᐃᓅᓱᑦᑑᓗᐊᕐᓂᕋᒥ ᐱᓇᓱᑦᑎᐅᒋᐊᒥᒃ, Newfoundlandᒥ. ᑌᑦᓱᒪᓂ ᐊᑦᓱᔫᓂᒃᑰᒐᒥ ᐱᓇᓱᐊᒐᖃᕐᓗᓂ ᑭᓯᐊᓂᐅᑦᓴᕋᓗᐊ. ᐊᖓᔪᕐᖄ ᐋᓕᕙ ᑐᓗᒐᖅ ᐅᖃᐅᓯᖃᖅᓯᒪᔪᖅ ᐃᒪᒃ. "ᑭᒻᒥᕈᒥᑦ ᐃᓄᓐᓂᒃ ᖃᐅᔨᒋᐊᖕᖓᓯᒪᔪᖅ ᐅᑯᓂᖓᓗᐊᖕᖑᐊᖅ, ᑐᖕᖓᕕᓪᓚᕆᖏᓐᓂᓗ, ᐃᓱᒪᒍᓯᖏᓐᓂᓗ. ᐅᖃᕐᓯᒪᔪᖅ ᐃᓅᓯᕐᒧᐊᖓᔪᓂ ᐃᓕᓐᓂᐊᑎᑦᓯᔨᐅᖕᖏᓇᒥ. ᑕᑯᑎᑕᐅᓯᒪᔪᖓ ᑭᓯᐊᓂ ᐃᓄᐃᑦ ᓇᓪᓕᒍᓱᓐᓂᖏᑦᑕ ᐃᓅᖃᑎᒥᓂ. ᑖᒥ ᒫᓂᖕ ᐊᓈᓇᖓᓄᑦ ᖁᓕᑦᑕᓕᐅᕐᑕᐅᒐᒥ, ᑕᐯᑦᓯᐊᓚᐅᕐᑐᕕᓂᖅ. ᖃᐅᔨᒋᐅᕐᓯᒪᔭᖏᑦ ᑌᑦᓱᒪᓂᐊᓗᒃ ᐃᓪᓕᕆᔭᕐᑖᕆᓯᒪᔭᖏᑦ ᐃᑲᔪᕐᓯᒪᓪᓚᕆᑦᑐᑦ, ᐃᓅᓯᖓᓄᑦ ᑐᖕᖓᕕᒋᔭᐅᓯᓯᒪᑦᓱᑎᓪᓗ, ᐱᓂᐊᕐᓂᕆᕙᓐᓂᐊᓕᕐᑕᖏᓐᓄᑦ. ᐲᑕ ᐱᓇᓱᑦᑕᑐᐊᖃᕐᓯᒪᖕᖏᒪᑦ ᐊᓐᓇᐅᒪᔾᔪᑎᑦᓴᓂᒃ ᐱᕙᓪᓕᐊᑎᑦᓯᒐᓱᐊᕐᓂᒥᒃ ᓄᓇᕕᒻᒥ, ᐃᓄᓐᓂᒃ ᐱᒍᔾᔨᒍᒪᓂᖃᕐᓂᒥᑎᒍᑦ ᐃᓚᑦᓭᓇᕐᑎᓗᒍ. ᐃᓚᒌᒍᑦᓱᑎᓪᓗ ᐃᑲᔫᑎᑦᓴᓕᐅᓪᓚᕆᓯᒪᑦᓱᓂ ᓄᓇᕕᒻᒥ ᐃᓅᓯᖓᓄᑦ. ᒥᕐᖑᐃᓯᑦᓯᐊᓕᕆᑦ, ᐃᓚᓐᓈᕆᔭᕗᑦ ᐲᑕ."

ᓘᓯᓪ ᐃᓚᒥᓂᒃ ᐅᖃᕈᔾᔨᒍᒪᔪᖅ ᐃᒫᒃ: "ᐆᒻᒪᑎᕗᑦ ᐊᑦᑐᑕᐅᒪᕗᖅ ᐃᓚᒌᒍᑦᓱᑕ ᔪᑑᒐᑕᓗ ᐊᒥᓱᓂᒃ ᐃᓅᓯᖓ ᐊᑦᑐᐃᓯᒪᒻᒪ ᑭᓯᐊᓂᓕ ᓭᒪᒍᑎᖃᕈᓐᓇᖁᒍ ᖃᐅᔨᒪᐅᑎᖃᕋᑦᑕ ᓭᒪᓂᖃᕐᖁᒍᑦ ᕿᒪᑦᑕᐅᒐᑦᑕ ᐃᓚᒌᒍᑦᓱᑕ ᐊᑕᐅᓯᖕᖑᓯᒪᑦᓯᐊᓱᑕ, ᒪᑭᑦᑕᑦᓯᐊᓕᕐᑐᖅ ᐃᓚᒌᓴᖅ ᐃᓄᐃᓪᓗ ᒪᑲᓐᓂᖃᕐᓯᒪᑦᓱᑎ ᓱᖑᓯᓯᒪᑦᓱᑎ ᐲᑕ ᐱᕈᕐᐸᓕᐊᖃᑎᖏᑦᓱᓂᐅᒃ.

ᐲᑕ ᒧᑖᒃ ᐃᓕᑕᕆᔭᐅᓯᒪᕗᖅ, ᐃᓅᓯᓕᒪᖅ ᐱᓇᓱᑦᓯᒪᓂᖓᑎᒍ. ᐅᑯᐊᓗᐊᖕᖑᐊᑦ ᐃᓕᑕᕆᔭᐅᒍᑎᒃ ᐅᐱᓐᓇᓂᖓᑎᒍ ᓯᑕᒪᖓᓂᒃᑐᖅ ᐅᑯᓇᖕᖓ Ordre du Mérite , ᑐᓂᔭᐅᓯᒪᔪ ᑯᐯᒻᒥ ᑯᐊᐸᖃᑎᒌᑦᑐᑦ ᑲᑐᔾᔨᖃᑎᒌᕝᕕᖓᓂ 2003ᒥ ᐊᒻᒪᓗ ᐃᓕᑕᕆᐅᔭᐅᒍᑎ ᑲᓇᑕᒥ ᐳᕐᑐᓂᕐᐹᖅ, (Order of Canada) 2015ᒥᑦ.

ᐃᓗᕕᕐᓰᕕᒻᒥ ᑎᒥᖓᓂᒃ ᑕᑯᓂᐊᕐᓃᑦ ᐅᕙᓃᓚᕐᖁᑦ

Rideau Memorial Gardens and Funeral Home
4275 Sources Blvd
Dollard-des-Ormeux, Quebec
H9B 2A6

ᐊᓪᓕᖏᓱᖓᕐᑐᓂ ᑎᓯᒻᐱᕆ 12ᒥ, 2015.     2ᖑᒥ - 5ᖑᒧᑦ ᐅᓐᓄᓴᒃᑯᑦ
                                                                   7ᖑᒥ - 9ᖑᒧᑦ ᐅᓐᓄᑐᒃᑯᑦ
ᐊᓪᓕᑐᓂ: ᑎᓯᒻᐱᕆ 13ᒥ, 2015                  10ᖑᒥ - 11ᖑᒧᑦ ᐅᓪᓚᑯᑦ. ᐃᓱᓕᕕᖃᓗᓂ ᓄᓇᒧᕐᓯᔪᑎᓂᒃ.

ᐲᑕ ᒧᑖᒃᒥᑦ ᐃᕐᖃᐅᒪᑦᓯᓃᑦ ᐊᑐᕐᑕᐅᓛᕐᒥᔪ ᐳᕕᕐᓂᑐᖅ, ᑯᐯᒃ, ᐊᕐᕋᒎᓚᕐᑐᒥ. ᐅᓪᓗᖓ ᓱᓕ ᖃᐅᔨᒪᓇᖕᖏᑐᖅ.