14 ᑯᐊᐯ ᑭᒡᒐᑐᕐᑎᖏᑦ, 15-ᓗ ᐃᓚᒌᓴᐅ ᑲᑎᒪᔨᖏᑦ ᑐᓴᕐᑎᑕᐅᖃᑦᑕᓚᐅᕐᖁᑦ ᐱᕙᓪᓕᐊᓯᒪᔪᓂᑦ ᐃᓚᒌᓴᐅᑉ ᐊᓪᓚᕕᖁᑎᖏᑦᑕ, ᑎᒥᖕᖑᑎᓯᒪᔭᖏᑦᑕᓗ, ᐊᓯᖏᓐᓂᓗ ᕿᒥᕐᕈᓱᑎᒃ ᑯᐊᐸᓐᓂᑯᑦ ᐱᓇᓱᐊᕐᑕᐅᓯᒪᔪᓂᑦ, ᐊᕐᕌᒍᑕᒪᕐᓯᐅᑎᑎᒍᑦ ᐊᐅᓚᑕᐅᓯᒪᔪᓂᑦ, ᐊᒻᒪᓗ ᐱᓇᓱᐊᕐᑕᐅᓯᒪᔪᓂᑦ ᐃᓄᒡᒍᑎᑦᓴᓕᐅᕐᓂᒥᒃ ᐱᕙᓕᐊᑕᐅᒐᓱᐊᕐᑐᓂᑦ.  

ᑐᓴᕐᑎᓯᒍᑎᑦ ᐊᓪᓚᕕᖁᑎᖏᑦᑕ ᐱᒍᑦᔨᓂᖏᑦᑎᕉᕐᑐᑦ ᑯᐊᐸᓄᑦ ᐃᓚᐅᑎᓪᓗᒋᑦ ᑎᒥᖕᖑᑎᓯᒪᔭᓕᒪᖐᓪᓗ - ᓄᓇᕕᒻᒥ ᐅᕐᓱᐊᓗᓐᓂᐊᓂᕐᒥ ᐱᒍᑦᔨᕕᒃ, ᐃᓚᒌᓴᐅᑉ ᓴᓇᔨᖁᑎᖃᓂᖓ ᑎᒥᖕᖑᑎᓯᒪᔪᖅ,  ᑕᕐᕋᒧᑦ ᐃᖏᕐᕋᐅᑎᓕᓂᑦ ᑎᒥᖕᖑᑎᓯᒪᔪᖅ, ᐃᓕᒌᓴᐅᑉ ᐊᕐᕕᑕᐅᑎᓕᕆᕕᖓ ᑎᒥᖕᖑᑎᓯᒪᔪᖅ - ᓴᕐᕿᑎᑦᓯᓚᐅᖁᑦ ᐃᓗᐃᒃᑲᐅᓕᑎᕐᓯᒪᔪᓂᑦ ᐃᑎᕐᑎᑕᐅᓯᒪᔪᑦ $232 ᒥᓕᐊᓐ, ᑯᐊᐯᓪᓗ ᐃᓘᓐᓇᑎᒃ ᐃᑎᕐᑎᓯᓐᓂᒥᑎᓗᒋᑦ $96.8 ᒥᓕᐊᓐᓂᒃ ᐅᓄᕐᓯᒋᐊᕐᓂᖏᑦ 8% ᖄᖏᔪᑦ ᐊᕐᕌᒎᑉ ᐅᖓᓪᓕᐅᑉ ᐊᐅᓚᑕᕕᓂᖏᓐᓂᑦ.

ᐃᓚᒌᓴᐅᑉ ᑲᑎᒪᔨᖏᑦ ᐃᓗᓐᓇᑎᒃ ᐊᖏᕐᓱᑎᒃ ᐅᑎᕐᑎᓯᓚᐅᕐᑐᑦ $10.5 ᒥᓕᐊᓐᓂᑦ 14-ᓄᑦ ᑯᐊᐸᓄᑦ ᐃᓚᐅᔪᓄᑦ.

ᑯᐊᐯᑦ ᐃᓚᐅᔪᑦ ᑐᓴᕐᑎᑕᐅᓚᐅᕐᓱᑎᓪᓗ ᑯᐊᐯᑦ ᐊᐅᓪᓚᑎᑦᓯᓂᕐᒥ ᐃᑲᔪᕐᓯᔭᐅᒍᑎᖏᑦᑕ ᑮᓇᐅᔭᖁᑎᖏᑦ ᑲᔪᓯᓂᐊᕐᓂᖓᓂᑦ, ᐱᒋᐊᕐᑎᑕᐅᔪᕕᓂᐅᑦᓱᓂ 2013, ᐊᑐᕐᑕᐅᒍᓐᓇᓱᓂᓗ ᑯᐊᐸᓄᑦ ᐃᓕᒃᑯᑦ ᓇᓕᑭᓪᓕᑎᕆᒍᑎᐅᑦᓱᓂ ᓂᐅᕕᐊᑦᓴᓂᑦ ᓇᓪᓕᑲᕐᑕᐅᓯᒪᔪᓂᑦ. ᑯᐊᐯᑦ ᐃᓚᐅᔪᑦ ᐊᑐᕈᓐᓇᑐᑦ ᐃᓚᖓᓂᑦ 1% ᑖᒃᓰᔭᒃᑫᓂᕐᒥᓄᑦ ᓄᓇᓕᒻᒥᓂ ᑯᐊᐸᑦ ᐊᐅᓪᓚᑎᑦᓯᓂᕐᒥ ᐃᑲᔪᕐᓯᔭᐅᒍᑎᖏᑦᑕ ᑮᓇᐅᔭᖁᑎᖏᑦ ᑲᑎᕐᓱᐃᕕᒻᒧᑦ, ᐃᓚᒌᓴᕐᓗ ᐊᑭᑦᓯᔪᓂᑦ ᓄᐊᑕᐅᒪᔪᑦ ᑐᓂᔨᒐᔭᕐᓱᓂ, ᑌᒪ ᐊᐅᓪᓚᑎᑦᓯᓂᕐᒥ ᐃᑲᔪᕐᓯᔭᐅᒍᑎᖏᑦᑕ ᑮᓇᐅᔭᖁᑎᖏᑦ ᒪᕐᕈᕕᓗᐊᑐᓂᑦ ᐊᑐᕋᑦᓴᖃᕐᓂᐊᓕᕐᒪᑕ ᐱᕙᓪᓕᐅᑎᑦᓴᖑᕐᓯᒪᔪᑦ ᑯᐊᐸᑯᓄᑦ ᐃᓚᐅᔪᓄᑦ. ᑯᐊᐸᖓ  ᑐᑭᑖᓱᖅ ᓇᒻᒥᓂᖅ ᐊᐅᓪᓚᑎᑦᓯᓂᕐᒥ ᐃᑲᔪᕐᓯᔭᐅᒍᑎᖏᑦᑕ ᑮᓇᐅᔭᖁᑎᖏᑦ ᖃᓄᖅ ᐊᑐᕐᑕᐅᔪᑦᓴᐅᒪᖔᑕ ᓂᐅᕕᕐᕕᖓᓂ.

ᓂᕈᐊᕐᓂᖅ ᑲᔪᓯᒃᑫᔨᓚᕇᑦᓴᓂᑦ ᐊᕐᕌᒍᑕᒪᑦ ᐊᑐᕐᑕᐅᓲᒍᕗᖅ, ᓱᕗᓪᓕᐹᒍᒍᑎᒥ ᐃᓚᒌᓴᐅᑉ ᑲᑎᒪᔨᖏᑦᑕ ᑲᑎᒪᓂᖓᓂ, ᑲᑎᒪᓂᒻᒪᕆᐅᑉ ᑭᖑᓂᐊᒍᑦ. ᐋᓕᕙ ᑐᓗᒐᑦ ᐳᕕᕐᓂᑐᕐᒥᐅᖅ ᓂᕈᐊᕐᑕᐅᓚᐅᕐᖁᖅ ᐊᖓᔪᕐᖃᑉ ᐃᓂᖓᓄᑦ, ᓵᓕ ᑕᕐᖀᐊᐱᒃ ᐊᖓᔪᖄᒧᑦ ᑐᖓᓕᕆᔭᐅᓯᑎᓪᓗᒍ ᐅᖓᕙᒥ ᓂᕈᐊᕋᑎᓪᓘᓃᑦ, ᖁᐊᕐᑕᒥᐅᒍᑦᓱᓂ. ᓵᔪᐃᓕ ᐅᐃᑖᓗᑦᑐᖅ ᐃᓄᒃᔪᐊᒥᐅᖅ ᓂᕈᐊᕐᑕᐅᓚᐅᕐᖁᖅ ᐊᖓᔪᖄᒧᑦ ᑐᖓᓕᕆᔭᐅᓯᑦᓱᓂ ᑕᓯᐅᔭᕐᔪᐊᒥ; ᒪᕐᕉᓗ ᑲᔪᓯᒃᑫᔨᓚᕇᖕᖑᖃᑕᐅᑦᓱᑎᒃ, ᐹᐱ ᐹᕈᓐ, ᑲᖏᕐᓱᐊᓗᒃᔪᐊᒥᐅᖅ ᓂᕈᐊᑕᐅᓱᓂ, ᐊᒻᒪᓗ ᐋᓚᓯ ᐊᐅᐸᓗᒃ ᐊᑯᓕᕕᒻᒥᐅᖅ ᐃᓕᔭᐅᑎᓪᓗᒍ ᓂᕈᐊᕐᓂᐅᖏᑦᑐᑯᑦ.

ᐃᓚᒌᓴᐅᑉ ᑲᑎᒪᓂᒻᒪᕆᖓ ᐃᓕᑕᕆᔭᐅᒍᑎᑕᕐᑎᓯᓚᐅᕐᒥᔪᖅ ᐱᑦᓯᐊᓂᕐᐹᕕᓂᕐᒧᑦ ᑯᐊᐸᒧᑦ ᐊᒻᒪᓗ ᐱᕙᓪᓕᐅᒥᓂᕐᐹᕕᓃᕐᒧᑦ ᑯᐊᐸᒧᑦ. ᕿᒥᕐᕈᑕᐅᓂᖃᓯᒪᑦᓱᑎᒃ ᑯᐊᐯᑦ ᓴᓚᓐᓂᒍᑎᑖᕐᑎᑕᐅᓯᒐᒥᒃ ᐊᕐᕌᒍᑕᒫᕐᓯᐊᑎᖏᑦᑕ ᕃᓯᐅᖏᑦᑕ, ᐃᓚᐅᑎᓪᓗᒋᑦ ᐱᓇᓱᐊᕈᑎᖃᕐᓂᐅᑉ ᓲᖑᓂᖓᓂᑦ, ᓂᐅᕕᐊᑦᓴᖁᑎᖏᑦᑕᓗ ᓂᐅᕕᐊᒍᖃᑦᑕᓂᖏᓐᓂᑦ, ᓂᐅᕕᕐᕕᐅᓗ ᐃᑎᕐᑎᑕᕕᓂᓕᒫᖏᑦ, ᐊᓯᖏᓪᓗ. ᓵᓚᓐᓃᒍᑎᑕᕐᑐᑦ ᐱᑦᓯᐊᓂᕐᐹᕕᓂᖅ 2014 ᐃᓄᒃᔪᐊᒥᐅᑦ ᑯᐊᐸᖓᑕ ᑲᑐᑦᔨᖃᑎᒌᓐᓂᖓ ᓱᓕ ᐊᒻᒪᓗ ᐱᕙᓪᓕᐅᒥᓂᕐᐹᕕᓃᕐ ᓴᓚᖃᐅᑎᑕᕐᑐᖅ ᑐᓂᐅᔭᐅᓚᐅᔪᔪᖅ ᑰᔾᔪᐊᕌᐱᒻᒥᐅᑦ ᑯᐊᐸᖓᑕ ᑲᑕᑦᔨᖃᑎᒌᓐᓂᖓᓄ 2014ᒧᐊᖓᔪᓄᑦ, ᐱᑦᓱᓂ ᖁᐊᑕᒥᐅᑦ ᑯᐊᐸᖓᑕ ᑲᑕᑦᔨᖃᑎᒌᓐᓂᖓᓂᑦ. 

ᐅᐱᒪᓇᕐᑑᕗᓯ ᓴᓚᖃᕐᑑᔪᓯ!

PDF