ᑕᓴᕐᑎᓯᐅᑎᑦ ᐊᕕᑦᑐᓯᒪᔪᓕᒫᓂᑦ ᐱᔪᑦ, ᑯᐊᐯᑦ ᐃᓚᐅᔪᓂᓪᓗ, ᑎᒥᐅᔪᖁᑎᖏᓐᓂᓗ -  ᓄᓇᕕᒻᒥ ᐅᕐᓱᐊᓗᓐᓂᐅᓂᖅ ᑎᒥᖕᖑᑎᓯᒪᔪᖅ, ᓯᐊᕕᕕᓪ ᐅᕐᓱᐊᓗᓐᓂᐊᓂᖅ ᑎᒥᖕᖑᑎᓯᒪᔪᖅ, ᐃᓚᒌᓴᐅᑉ ᓴᓇᔨᖁᑎᖃᓂᖓ ᑎᒥᖕᖑᑎᓯᒪᔪᖅ, ᑕᕐᕋᒧᑦ ᐅᓯᔩᑦ ᑎᒥᖕᖑᑎᓯᒪᔪᖅ, ᐃᓚᒌᓴᑉ ᐊᕐᕕᑕᐅᑎᓕᕆᕕᖓ ᑎᒥᖕᖑᑎᓯᒪᔪᕐᓗ ᐃᓚᐅᑎᓪᓗᒋᑦ. ᐱᓇᓱᐊᖃᑎᖓᓗ ᓵᑕᑦᓴᐅᖃᑎᒋᓚᒍ - ᓇᔅᑭᓅᒃᑯᑦ S.E.C., ᓯᐊᕕᕕᓪᒥᑦᑐᖅ ᑕᑯᑦᓴᐅᑫᓚᐅᔪᔪᖅ ᐃᓗᐃᑲᖑᕐᑎᑕᐅᒪᔪᓂᒃ ᑮᓇᐅᔭᕐᓂᒃ ᐃᑎᕐᑎᑕᕕᓂᕐᒥᓂᒃ $25 ᒥᓕᐊᓐᓂᒃ. ᑕᓴᕐᑎᓯᐅᑎᑦ ᑮᓇᐅᔭᓕᕆᓂᕐᒥ ᐊᕐᕌᒍᖓᓂ 14 ᑯᐊᐯᑦ ᐃᓚᐅᔪᓄᑦ ᐊᑐᕐᑕᐅᓯᒪᔪᑦ ᐅᓄᕐᓂᖏᑦ ᐃᓗᓐᓈᒍᑦ $104 ᒥᓕᐊᓐ ᖑᓚᔪᔪᑦ, ᐅᓄᕐᓂᓴᐅᓕᕐᓱᑎᑦ 7 ᐳᓴᓐᑎᖓᓄᑦ ᐊᕐᕌᒎᓚᐅᔪᔪᒥᑦ.

ᑲᑎᒪᓂᐅᔪᒥ ᑲᑎᒪᔪᑦ ᐃᓗᓐᓇᓯᐊᑎᑦ ᐊᖏᓚᐅᔪᕗᑦ ᐅᑎᑦᑕᐅᒍᑎᐅᔪᓂᒃ ᐅᓄᕐᓂᓕᓐᓂᒃ $12 ᒥᓕᐊᓂᒃ, 14ᖑᔪᓄᑦ ᑯᐊᐸᓄᑦ ᐃᓚᐅᔪᓄᑦ.  ᐊᖏᕐᑕᐅᓚᐅᔪᑦᓱᓂᓗ ᐱᕐᖁᓯᓄᑦ ᑮᓇᐅᔭᖁᑎᖏᑦ ᓴᕐᕿᑎᑕᐅᒋᐅᕐᓂᖓ. ᑮᓇᐅᔭᖁᑎᖏᑦ ᐊᕐᕿᑕᐅᒪᔪᑦ ᐃᑲᔪᕐᐸᖁᑦᓱᒋᑦ ᐱᓇᓱᐊᕐᑕᐅᔪᓂᒃ ᓄᓇᓕᓐᓂ ᓄᓇᕕᒻᒥ. ᐊᖏᓚᐅᔪᑦᓱᑎᓪᓗ ᐃᓚᒌᓴᐅᑉ ᑯᐊᐯᓪᓗ ᐃᓚᐅᔪᑦ ᑮᓇᐅᔭᕐᑎᒍ ᐃᑲᔪᖃᑎᒋᑦᑐᓴᐅᓂᖏᓐᓂᒃ. ᓇᓕᖁᐊᒋᑦᑐᓂᒃ ᐃᑲᔫᑎᖃᕐᐸᓂᐊᕐᓱᑎᒃ ᑕᒪᕐᒥᑦ. ᐅᓄᕐᓂᖏᑦ $600,000ᖑᔪᑦ 2015ᓐ ᐊᕐᕌᒍᖓᓄᐊᖓᔪᑦ ᐊᖏᕈᑕᐅᔪᑦ.

ᐃᓚᒌᓴᐅᑉ ᑲᔪᓯᒃᑫᔨᓪᓚᕆᖏᓐᓂᒃ ᓂᕈᐊᓂᖅ ᐊᑑᑎᔭᐅᓚᐅᔪᕗᖅ ᐃᓚᒌᓴᐅᑉ ᑲᑎᒪᔨᖏᑦᑕ ᓯᕗᓪᓖᐸᒥ ᑲᑎᒪᓂᖓᓂ, ᑲᑎᒪᓂᒻᒪᕆᐅᑉ ᐃᓱᐊᓂ. ᐋᓕᕙ ᑐᓗᒐᖅ ᐳᕕᕐᓂᑐᒥᐅᖅ ᐃᓂᑖᓚᐅᔪᔪᖅ ᓂᕈᐊᒐᑦᓴᑑᓂᑯᒥᓄᑦ ᐊᖓᔪᖅᑳᖑᕐᓱᓂ. ᓵᓕ ᑕᕐᕿᐊᐱᒃ, ᖁᐊᕐᑕᒥᖅ ᐃᓂᑖᓚᐅᔪᔪᖅ ᓂᕈᐊᒐᑦᓴᑑᓂᑯᒥᓄᑦ ᐊᖓᔪᖅᑳᒧᑦ ᑐᖓᓕᐅᓯᑦᓱᓂ ᐅᖓᕙᒻᒥ. ᓵᔪᐃᓕ ᐅᐃᑖᓗᑦᑐᖅ, ᐃᓄᒃᔪᐊᒥᐅᖅ ᐃᓂᑖᓚᐅᔪᔪᖅ ᓂᕈᐊᒐᑦᓴᑑᓂᑯᒥᓄᑦ ᐊᖓᔪᖅᑳᒧᑦ ᑐᖓᓕᐅᑦᓱᓂ ᑕᓯᐅᔭᕐᔪᐊᒧᑦ. ᒪᕐᕉᖅ ᑲᔪᓯᒃᑫᔨᐅᓚᕆᖕᖑᖃᑕᐅᓚᐅᔪᒻᒥᔪᒃ ᐹᐱ ᐹᕋᓐ, ᑲᖏᕐᓱᐊᓗᑦᔪᐊᒥᖅ ᐃᓂᑖᓚᐅᔪᔪᖅ ᓂᕈᐊᒐᑦᓴᑑᓂᑯᒥᓄᑦ, ᐊᓪᒪᓗ ᒫᑭ ᓴᕕᐊᕐᔪᒃ ᐳᑐ, ᓴᓪᓗᒥᐅᖅ ᓂᕈᐊᕐᑕᐅᓂᒃᑰᑎᓪᓗᒍ.

ᑲᑎᒪᓂᐅᔪᖅ ᓵᓚᖃᕐᓂᐅᑎᓐᓂᒃ ᑐᓂᕐᖁᑎᖃᓚᐅᔪᔪ ᒪᕐᕉᓂᒃ ᓄᓇᕕᒥ ᑯᐊᐸᐅᔪᓐᓄᑦ. ᓴᓚᓃᑦᓯᒍᑏᑦ ᐃᒣᑦᑑᓂᖏᓐᓄᑦ ᓚᒍᑎᐅᔪᑦ ᑮᓇᐅᔭᕐᓀᑕᐅᓂᒃᑯᑦ ᕿᒥᕐᕈᑏᑦ ᐊᑐᕐᓱᒋᑦ. ᐲᑕ ᒧᑖᒃ ᓵᓚᖃᒍᑏᑦ ᑯᐊᐸᒧᑦ ᐃᖏᕐᕋᓯᐊᕐᓂᐹᒧᑦ ᐱᔭᐅᓚᐅᔪᔪᖅ ᐃᓄᒃᔪᐊᒥᐅᑦ ᑯᐊᐸᖓᑕ ᑲᑐᑦᔨᖃᑎᒌᓐᓂᖓᓄᑦ. ᓵᓚᓃᔪᑎᑦ ᑐᓂᕐᖁᑕᐅᓱᖅ ᐃᖃᐅᒪᑦᓯᒍᑎᐅᔪᖅ ᐲᑕ ᒧᑖᒃᖑᓚᐅᔪᔪᒥᑦ, ᐱᒋᐊᑎᓯᖃᑕᐅᓯᒪᑦᓱᓂᓗ, ᑲᒪᔨᒻᒪᕆᐅᓯᒪᑦᓱᓂᓗ ᐃᓚᒌᓴᕐᒥᑦ. ᐃᓅᔪᓐᓀᓚᐅᔪᔪᖅ ᑏᓯᒻᐱᕆ 2015ᒥ. ᓵᓚᖃᕈᑎᒃ ᑯᐊᐸᒧᑦ ᐱᕙᓪᓕᓂᕐᐹᕕᓂᕐᒧᑦ 2015ᒥ ᐱᔭᐅᓚᐅᔪᔪᖅ ᐊᑯᓕᕕᒻᒥᐅᑦ ᑯᐊᐸᖓᑕ ᑲᑐᑦᔨᖃᑎᒌᓐᓂᖓᓄᑦ. ᐊᕐᕌᓂᐅᓚᐅᔪᔪᖅ ᐱᔭᐅᓯᒪᓚᐅᔪᑦᓱᓂ ᑰᑦᔪᐊᕌᐱᒻᒥᐅᑦ ᑯᐊᐸᖓᑕ ᑲᑐᑦᔨᖃᑎᒌᓐᓂᖓᓄᑦ. 

ᑐᓴᕆᐅᕕᓴᖅ:  ᒫᓂ ᓚᐅᕆᑦ
Tel : 514-457-9371 Ext. 504
emanuel.lowi@fcnq.ca