ᐃᓚᒌᓴᐅᑉ ᑐᑭᒧᐊᑦᑎᓯᔨᐅᓂᕐᒧᑦ ᑲᑎᒪᔨᖏᑦ (ᐃᓚᒌᓴᖅ), ᐃᓚᒌᓴ ᑲᑎᒪᔭᕐᑐᓯᒪᓚᐅᕐᑐᓗ 14-ᓂᒃ ᐃᓚᐅᒍᑎᓕᓐᓂᒃ ᑯᐊᐸᓐᓂᒃ ᐱᓯᒪᔪᑦ ᑲᑎᒪᓕᓚᐅᕐᑐᑦ ᑕᓯᐅᔭᕐᒥ ᑎᕆᓪᓗᓕᐅᑦ 20-ᒥᒃ 23-ᒧᑦ 55-ᕆᓕᕐᑕᖓᓂᒃ ᐊᕐᕌᒍᑕᒫᕐᓯᐅᑎᒥᒃ ᑲᑎᒪᓂᒻᒪᕆᖃᕐᑎᓗᒋᑦ ᓄᓇᕕᒻᒥ ᑯᐊᐯᑦ.  ᑖᓐᓇ ᑲᑎᒪᓂᖅ ᐃᓚᖃᓚᐅᕐᑐᖅ ᐱᓇᓱᐊᕐᑕᐅᔪᑦ ᓱᓕᕆᒍᑕᐅᔪᓪᓗ ᐱᕙᓪᓕᐊᒍᑕᐅᓂᖏᑕ ᑐᓴᕐᑎᓯᒍᑎᑕᖏᓐᓂᒃ ᐃᓚᒌᓴᐅᑉ ᐱᓇᓱᑉᕕᖏᓐᓂᒃ ᐱᔪᓂᒃ, ᐊᐅᓚᑕᖏᓐᓂᒃ ᑎᒥᐊᕈᖁᑎᖏᓐᓂᓗ 2020-ᒧᑦ ᐃᓚᖃᕐᒥᓱᓂ ᓱᓕ ᑮᓇᐅᔭᓕᕆᒍᑕᐅᓚᐅᕐᑐᓂᒃ.
 

“ᖃᓂᒪᓐᓇᖅ 19 ᐱᔭᕆᐊᑦᑐᐃᒪᖃᑦᑕᓚᐅᒐᓗᐊᕐᑎᓗᒍ, ᐱᓇᓱᐊᓚᐅᕐᑕᕗᑦ ᓄᐃᑦᓯᓚᐅᕐᑐᑦ ᐊᒥᐊᒃᑯᓯᒪᒍᑎᑦᓴᓂᒃ ᐱᕙᓪᓕᖁᑎᒋᓂᐊᕐᒥᔭᖏᓐᓂᒃ ᐃᓚᐅᔪᖁᑎᑕ ᑯᐊᐸᑦᑎᓂ ᐊᑭᑭᓪᓕᒋᐊᕐᓯᒪᒍᑦᔭᐅᓂᒃᑯᑦ ᐱᕙᓪᓕᒋᐊᕐᓯᒪᔪᒥᓪᓗ ᐱᒍᑦᔭᐅᓂᒃᑯᑦ” ᐅᖃᓚᐅᕐᑐᖅ ᒥᐅᔨ ᔪᐊᓇᓯ, ᐃᓚᒌᓴᐅᑉ ᐊᖓᔪᕐᖄᖓ. ᒪᑯᐊ ᐱᒍᑦᔨᒍᑎᑕ ᐃᓚᖏᑦ ᐊᒥᓲᖕᖏᑐᑦ ᐱᓇᓱᐊᕐᑕᖏᑦ ᓄᖑᒋᐊᕐᓯᒪᓚᐅᕋᓗᐊᕐᑎᓗᒋᑦ ᖃᓂᒪᓐᓇᖅ ᐱᑦᔪᑕᐅᑎᓪᓗᒍ, ᒪᑯᐊ ᓱᖕᖏᓗᐊᕈᑎᒋᓇᔭᕐᑕᖏᑦ ᖃᓗᔭᐅᓚᐅᕐᑐᑦ ᐱᐅᓂᕐᓴᓄᑦ ᑭᓯᑦᓯᑎᓄᑦ ᓄᐃᑦᓱᑎᒃ ᐊᓯᖏᑎᒍᑦ ᐃᓚᒌᓴᐅᑉ ᐊᐅᓚᑕᖏᓐᓄᑦ ᑎᒥᐊᕈᖁᑎᖏᓐᓄᓗ, 2020-ᒥ ᐱᕈᕐᐸᓚᖔᓚᐅᕐᒥᔪᑦ.  ᑲᑎᒪᓂᒻᒪᕆᒃ ᐃᓘᓐᓇᑎᒃ ᐊᖏᕐᑎᓗᒋᑦ ᐅᑎᕐᑕᐅᒍᑎᑦᓴᓕᐅᓚᐅᕐᑐᖅ ᓂᖏᕋᔭᕐᑎᓗᒋᑦ $14.5 ᒥᓕᐊᓂᒃ ᐃᓚᐅᒍᑎᓖᑦ ᑯᐊᐯᑦ.
 

ᐊᕐᕌᒍᑕᒫᕐᓂᐅᑎᒥᒃ ᑲᑎᒪᓂᒻᒪᕆᒃ ᑲᔪᓯᑎᒍᓐᓇᓯᓚᐅᕐᑐᖅ ᐃᓄᒃ ᐁᓯᒪᕈᓐᓇᓯᐊᕐᑎᓗᒍ ᓈᓚᑦᓯᐊᑐᐃᓐᓇᓱᒋᑦ ᓇᐅᓕᒫᑦ ᐃᓗᓯᕐᓱᓯᐊᒋᐊᖃᕐᓂᖓᓄᑦ ᒪᓕᒉᑦ.  ᐊᕐᕌᒍᒥ ᐊᓂᒍᕐᑐᒥ, ᑯᐊᐯᑦ ᐃᓚᒌᓴᓗ ᐊᐅᓚᑦᔭᒋᐊᕈᑎᖃᓚᐅᕐᑐᑦ ᓄᓇᕕᒻᒥᐅᑦ ᖃᓄᐃᖁᓇᒋᑦ ᓄᑖᓪᓗ ᐃᓗᓯᕐᒥ ᐱᐅᓯᕐᑖᕆᔭᑦᓭᑦ ᐊᑎᒋᐊᕈᓐᓇᓯᑦᓯᐊᓱᒋᑦ ᐱᓚᐅᔪᔪᑦ.

 

ᐃᓕᑕᕐᓯᓂᖅ ᑕᒣᑎᒍᑦ ᐃᓄᐃᑦ ᑮᓇᐅᔭᓕᐅᒐᓲᑎᖃᕐᓂᑯᑦ ᐊᓂᒍᐃᑦᓯᐊᖃᑦᑕᓂᖓᓂᒃ
 

ᑲᑎᒪᓂᒻᒪᕆᒃ ᐱᓕᐅᓯᐊᕐᑎᓯᓲᖑᒻᒪᑦ ᒪᕐᕉᓂᒃ ᓵᓚᖃᐅᓯᐊᕐᑎᓯᑦᓱᓂ ᐃᓚᐅᒍᑎᓕᓐᓂᒃ ᑯᐊᐸᓐᓂᒃ ᑮᓇᐅᔭᒥᓂᒃ ᐊᐅᓚᑦᓯᓂᕐᒥᒍᑦ ᐱᑦᓯᐊᓂᕐᐹᕕᓂᕐᓂᒃ.  ᐱᑕ ᒨᑖᒃ ᐱᓕᐅᓯᐊᒍᑎᖓ ᑯᐊᐸᑦᓯᐊᓂᐹᕕᓂᕐᒧᑦ 2020-ᒥ ᑲᖏᕐᓱᐊᓗᒃᔪᐊᑉ ᑯᐊᐸᖓᓐᓅᑕᐅᓚᐅᕐᑐᖅ.  ᐅᓇᓗ ᑯᐊᐸᓐᓂᒥ ᐱᕙᓪᓕᓯᒪᓂᕐᐹᒧᑦ ᐱᓕᐅᓯᐊᖅ ᑲᖏᕐᓱᐊᓗᒃᔪᐊᑉ ᑯᐊᐸᖓᓐᓄᑦ ᐱᔭᐅᓚᐅᕐᒥᔪᖅ.
 

ᒥᐊᔨ ᔪᐊᓇᓯ, ᐃᓕᑕᕐᓯᖃᑦᑕᓂᖅ ᐱᓪᓚᕆᐅᕗᖅ.  “ᐊᓕᐊᒋᔭᖃᓪᓚᕆᒃᑯᒍᑦ ᐃᓕᑕᕐᓯᒋᐊᒥᒃ ᐱᑦᓯᐊᑐᕕᓂᕐᓂᒃ ᑯᐊᐸᓐᓂᖅ ᑲᔪᖏᕐᓭᒍᑎᒋᔪᒪᒐᑦᑎᒍ” ᐃᕐᙯᑎᑕᐅᑦᓱᑕᓗ ᖃᓄᖅ ᐊᖏᔫᑎᓇᑕ ᐃᓚᒌᓴᐅᑉ ᐃᓚᐅᒍᑎᓕᖁᑎᖏᑦ ᓇᑯᕐᓴᓇᓕᓚᐅᕐᒪᑕ ᐃᓚᒌᓴᖓ ᐱᓕᐅᓯᐊᕐᑕᐅᒻᒪᑦ ᑯᐊᐸᓖᒪᑦ ᑲᑐᑦᔨᓂᐅᔪᓪᓗ ᑲᓇᑕᒥ 2020-ᖑᑎᓪᓗᒍ ᑯᐊᐸᓐᓂᖓ ᐊᖏᓂᕐᐸᐅᓚᐅᕐᓂᑯᖓᓄᑦ ᐊᕐᕌᒍᖓᓂ.
 

ᐃᓱᓕᒋᐊᕈᑎᒋᓗᒍ, ᑐᑭᒧᐊᑦᑎᓯᔨᐅᓂᕐᒧᑦ ᑲᑎᒪᔩᑦ ᑲᑎᒪᓕᓚᐅᕐᒥᔪᑦ ᓂᕈᐊᕐᓂᖃᕐᓱᑎᒃ ᐅᐃᒪᓇᕐᑐᓯᐅᑎᑦᓴᓂᒃ ᑲᑎᒪᓂᒻᒪᕆᒃ ᐃᓱᓕᑦᑎᓗᒍ.  ᒥᐊᔨ ᔪᐊᓇᓯ, ᑰᑦᔪᐊᒥᐅᖅ, ᐊᖓᔪᕐᖄᑉ ᐃᓂᖓᓄᑦ ᓂᕈᐊᕐᑕᐅᔪᑦᓴᑑᒐᒥ ᐃᓕᔭᐅᓚᐅᕐᑐᖅ.  ᐅᑯᐊᓗ ᐅᐃᒪᓇᕐᑐᓯᐅᑎᑦᓭᑦ ᓂᕈᐊᕐᑕᐅᓚᐅᕐᒥᔪᑦ ᐅᑉᕙᓘᓐᓃᑦ ᐃᓕᔪᑦᓴᑑᒐᒥᒃ ᐅᐃᒪᓇᕐᑐᓯᐅᑎᖕᖑᓱᑎᒃ: ᓵᓕ ᑕᕐᕿᐊᐱᒃ, ᖁᐊᕐᑕᒥᐅᖅ, ᐊᖓᔪᕐᖄᑉ ᑐᖓᓕᐊ ᐅᖓᕙᕐᒥᒃ, ᓵᔪᐃᓕ ᐅᐃᑕᓗᒃᑐᖅ, ᐃᓄᒃᔪᐊᒥᐅᖅ, ᐊᖓᔪᕐᖄᑉ ᑐᖓᓕᐊ ᑕᓯᐅᔭᕐᔪᐊᒥᑦ.  ᒪᕐᕉᓗ ᐅᐃᒪᓇᕐᑐᓯᐅᑎᖕᖑᑑᒃ ᑲᑎᒪᔨᓂ ᑯᓗ ᑐᑲᓚᒃ, ᐳᕕᕐᓂᑐᕐᒥᐅᖅ, ᐊᖂᔭᖅ ᕿᓰᖅ, ᑲᖏᕐᓱᔪᐊᕐᒥᐅᖅ.

 

ᐃᓚᒌᓴᐅᑉ ᒥᑦᓵᓅᖓᔪᖅ
 

ᓄᐃᓚᐅᕐᑐᕕᓂᖅ ᐊᐅᓚᑕᐅᓯᑦᓱᓂ ᓄᓇᕕᒻᒥᐅᓄᑦ, 14-ᖑᔪᑦ ᓄᓇᕕᒻᒥ ᑯᐊᐯᑦ ᐊᒥᓱᓂᒃ ᐱᒍᑦᔨᒍᑎᖃᕐᐸᑐᑦ ᓄᓇᓕᒻᒥᓂ: ᓂᐅᕕᕐᕕᒃ, ᓯᓂᑦᑕᕕᒃ, ᑕᓚᕖᓴᖃᕐᑎᓯᓂᖅ, ᐅᕐᓱᐊᓗᓐᓂᐊᕕᒃ, ᐅᕐᓱᐊᓗᑦᑕᓂᖅ, ᐊᓯᖏᓪᓗ.
 

1967-ᒥ ᓄᐃᓯᒪᓪᓚᕆᑦᑐᖅ ᓄᓇᕕᒻᒥ ᑯᐊᐸᓐᓂᒥ ᓴᓇᕐᕈᑎᑦᓴᖏᓐᓂᒃ ᐱᕕᑦᓴᑖᕐᑎᓱᒋᑦ ᐊᖏᓕᕙᓪᓕᐊᒐᓲᑎᒋᓂᐊᕐᑕᖓᓂ, ᐃᓚᒌᓴᖅ, ᓴᐳᑦᔨᓯᒪᔪᖅ ᐃᓚᐅᔪᖁᑎᒥᓂᒃ ᑯᐊᐸᓐᓂᒥ ᐊᑐᕐᓱᓂ: ᓂᐅᕕᕐᓂᒥᒃ, ᐱᔭᕆᐅᕐᓭᓂᕐᒥᒃ, ᐊᐅᓚᐅᓯᐅᕐᑎᖃᕐᑎᓯᓂᕐᒥᒃ, ᐱᓪᓗᑯᒋᐊᓕᓄᑦ ᐊᐅᓚᑦᓯᒍᑕᐅᒋᐊᓕᓐᓄᓪᓗ ᓴᐳᑦᔨᒪᓂᕐᒥᒍᓪᓗ.  ᐱᓇᓱᐊᖃᑕᐅᕙᒻᒥᔪᖅ ᐊᑦᔨᒋᖕᖕᑐᓂ ᑮᓇᐅᔭᓕᐅᒐᓲᑎᓂ ᐆᑦᑐᕋᐅᑎᒋᓗᒍ ᐃᓄᐃᑦ ᓴᓇᖕᖑᐊᒐᖏᓐᓂᒃ ᓂᐅᕐᕈᓯᓂᖅ, ᐃᑯᒻᒪᖁᑎᓕᐅᕐᓂᖅ ᐅᓯᑲᑦᑕᑎᐅᓂᕐᓗ.
 

ᐃᓚᒌᓴᐅᑉ ᑎᒥᐊᕈᖁᑎᖏᑦ ᐃᓚᖃᕐᐳᑦ ᓄᓇᕕᒃ ᐅᕐᓱᐊᓗᓕᕆᔨᓂᒃ, ᓯᐊᕗᕕᐊᓪᒥ ᐅᕐᓱᐊᓗᓕᕆᓂᖅ, ᐃᓚᒌᓴᐅᑉ ᓴᓇᔨᖏᑦ, ᑕᕐᕋᒧᑦ ᐅᓯᑲᑦᑕᑏᑦ, ᑲᑎᓐᓂᖅ ᐅᓯᑲᑦᑕᑏᑦ, ᐹᓪᓚᔮᑦ ᐅᓯᑲᑦᑕᑏᑦ, ᐊᐅᓚᒍᑎᓕᕆᓂᖅ ᐃᓚᒌᓴᒃᑯᑦ, ᐱᖁᑎᕗᑦ ᐊᑦᑕᑐᒉᑦ, ᑕᕐᖁᑎ ᐃᑯᒻᒪᖁᑎᓕᕆᓂᖅ - ᐃᓚᐅᕕᖃᒐᓗᐊᕐᒥᓱᑎᒃ ᓇᔅᑭᓄᒃ ᐅᕐᓱᐊᓗᓐᓂᐊᓂᖓᓂ, ᓯᐊᕗᕕᐊᓪᒥ.

 

ᑕᑯᒍᒪᒍᕕᑦ ᓄᓇᕕᒻᒥ ᑯᐊᐸᓐᓂᐅᑉ ᖃᓄᐃᓕᖓᓂᖓᓂᒃ ᐅᐸᑦᓴᕈᒃ:

https://www.facebook.com/455534244475061/videos/2618838078382271/

ᐅᑉᕙᓘᓐᓃᑦ ᐅᐸᓪᓗᑎᒍᑦ ᐅᕗᖓ www.fcnq.ca

- 30 -

 

 

ᑐᑭᓯᓴᕐᕕᓴᖅ :

ᑲᕈᓕᓐ ᒣᐆ
ᑐᓴᐅᒪᖃᑎᒋᓐᓂᖅ ᐃᓄᓐᓂᓗ ᖃᓄᐃᓘᕆᓂᖅ
ᐃᓚᒌᓴᖅ - ᑯᐯᑉ ᑕᕐᕋᖓᓂ ᑯᐊᐯᑦ ᐃᓚᒌᓴᖓ
caroline.mailloux@fcnq.ca
514 457-9371 ext. 436

 

PDF